bura hi kya tha jo aap apni misal hote kamal hote

burā hī kyā thā jo aap apnī misāl hote kamāl hote

kisī tarah se jo TuuTe rishte bahāl hote kamāl hote

ye lailā majnūñ ye hiir rāñjhā ye shīrīñ farhād kī mohabbat

thī aisī shiddat kahīñ jo un ke visāl hote kamāl hote

paḌhā nahīñ thā nisāb-e-ulfat amal meñ aage the har kisī se

samajhtī duniyā agar hameñ be-misāl hote kamāl hote

vo mujh se miltā ḳhamosh rahtā ḳhamoshiyoñ par hī daad paatā

magar jo nazroñ se munfarid se savāl hote kamāl hote

ye kyā ki tanhā.iyoñ se rishta banā ke ḳhud ko gañvā liyā hai

samā ke mujh meñ jo aap merā jamāl hote kamāl hote

jise bhī dekhā usī ko da.avā-e-husn karte sunā gayā hai

jahān bhar meñ hasīñ agar ḳhāl-ḳhāl hote kamāl hote

nasīb apnā suḳhanvaroñ meñ hamārī gintī na ho sakegī

'umar' adākār ham agar bā-kamāl hote kamāl hote

bura hi kya tha jo aap apni misal hote kamal hote

kisi tarah se jo TuTe rishte bahaal hote kamal hote

ye laila majnun ye hir ranjha ye shirin farhad ki mohabbat

thi aisi shiddat kahin jo un ke visal hote kamal hote

paDha nahin tha nisab-e-ulfat amal mein aage the har kisi se

samajhti duniya agar hamein be-misal hote kamal hote

wo mujh se milta KHamosh rahta KHamoshiyon par hi dad pata

magar jo nazron se munfarid se sawal hote kamal hote

ye kya ki tanhaiyon se rishta bana ke KHud ko ganwa liya hai

sama ke mujh mein jo aap mera jamal hote kamal hote

jise bhi dekha usi ko dawa-e-husn karte suna gaya hai

jahan bhar mein hasin agar KHal-KHal hote kamal hote

nasib apna suKHanwaron mein hamari ginti na ho sakegi

'umar' adakar hum agar ba-kamal hote kamal hote