burai kya hai tum ilzam do burai ka

burā.ī kyā hai tum ilzām do burā.ī kā

bashar huuñ maiñ mujhe da.avā nahīñ ḳhudā.ī kā

kiyā hai sajda kabhī yā nahīñ kiyā ḳhush huuñ

jabīñ pe daaġh nahīñ sajda-e-riyā.ī kā

kisī ke ishq meñ dīvāne ham na gar hote

to raaz khul nahīñ saktā thā pārsā.ī kā

zarā tum ab kahīñ chhup jaao har taḌap lau haiñ

ki yaad aayā hai mujh ko mazā judā.ī kā

nahīñ hai merī kisī aur kī hai ye bhī hadīs

qusūr-vār agar huuñ maiñ ḳhud-satā.ī kā

jise yaqīñ hai ki us ke nasīb meñ tum ho

gunāh kyuuñ vo kare qismat-āzmā.ī kā

ravāñ-davāñ huuñ mujhe apnī dhun meñ hosh kahāñ

bahāna le ke jo baiThūñ shikasta-pā.ī kā

usī kī raah meñ kāñTe bichhā.e jaate haiñ

nasīb uzr jise hai barahna-pā.ī kā

kise hai ilm nasīboñ meñ mire aap nahīñ

ḳhayāl chhoḌ duuñ kyuuñ qismat-āzmā.ī kā

jo ishq aam hai mere liye hai nañg-e-hayāt

madār aur hai merī ġhazal-sarā.ī kā

baḌā maza thā taḌapne meñ tilmilāne meñ

na bhūltā hai na bhūlegā din judā.ī kā

chaman ho aur shab-e-mahtāb-o-halqa-e-ahbāb

maza jabhī hai 'jigar' kuchh ġhazal-sarā.ī kā

burai kya hai tum ilzam do burai ka

bashar hun main mujhe dawa nahin KHudai ka

kiya hai sajda kabhi ya nahin kiya KHush hun

jabin pe dagh nahin sajda-e-riyai ka

kisi ke ishq mein diwane hum na gar hote

to raaz khul nahin sakta tha parsai ka

zara tum ab kahin chhup jao har taDap lau hain

ki yaad aaya hai mujh ko maza judai ka

nahin hai meri kisi aur ki hai ye bhi hadis

qusur-war agar hun main KHud-satai ka

jise yaqin hai ki us ke nasib mein tum ho

gunah kyun wo kare qismat-azmai ka

rawan-dawan hun mujhe apni dhun mein hosh kahan

bahana le ke jo baiThun shikasta-pai ka

usi ki rah mein kanTe bichhae jate hain

nasib uzr jise hai barahna-pai ka

kise hai ilm nasibon mein mere aap nahin

KHayal chhoD dun kyun qismat-azmai ka

jo ishq aam hai mere liye hai nang-e-hayat

madar aur hai meri ghazal-sarai ka

baDa maza tha taDapne mein tilmilane mein

na bhulta hai na bhulega din judai ka

chaman ho aur shab-e-mahtab-o-halqa-e-ahbab

maza jabhi hai 'jigar' kuchh ghazal-sarai ka