bure insan ko bad-kari ka mehwar khinch leta hai

bure insāñ ko bad-kārī kā mehvar khīñch letā hai

ki jaise-taise dariyā ko samundar khīñch letā hai

bhare bāzār meñ us shaḳhs ko sañgsār kar denā

gale se apnī biivī ke jo zevar khīñch letā hai

qadam mere nikal paḌte haiñ jab gumrāh rastoñ par

mujhe qur.ān kī jānib tirā dar khīñch letā hai

maiñ apne biivī bachchoñ meñ kahāñ se pyaar bāñTūñgā

lahū mere badan kā jabki daftar khīñch letā hai

mire mahbūb kī tahrīr se hai kis qadar mānūs

ḳhatoñ ke Dher se vo ḳhat kabūtar khīñch letā hai

jahāñ ġhurbat bilaktī hai jahāñ ma.asūm rote haiñ

mirī ġhazloñ kā shahzāda vo manzar khīñch letā hai

javānī thī to man-mānī kā tūfāñ thā tabī.at meñ

buḌhāpe meñ qadam rakkhā to bistar khīñch letā hai

'amīn' ehsās terā Dūbtā hai jab taḳhayyul meñ

samundar ke kināre hī se gauhar khīñch letā hai

bure insan ko bad-kari ka mehwar khinch leta hai

ki jaise-taise dariya ko samundar khinch leta hai

bhare bazar mein us shaKHs ko sangsar kar dena

gale se apni biwi ke jo zewar khinch leta hai

qadam mere nikal paDte hain jab gumrah raston par

mujhe quran ki jaanib tera dar khinch leta hai

main apne biwi bachchon mein kahan se pyar banTunga

lahu mere badan ka jabki daftar khinch leta hai

mere mahbub ki tahrir se hai kis qadar manus

KHaton ke Dher se wo KHat kabutar khinch leta hai

jahan ghurbat bilakti hai jahan masum rote hain

meri ghazlon ka shahzada wo manzar khinch leta hai

jawani thi to man-mani ka tufan tha tabiat mein

buDhape mein qadam rakkha to bistar khinch leta hai

'amin' ehsas tera Dubta hai jab taKHayyul mein

samundar ke kinare hi se gauhar khinch leta hai