burida bazuon mein wo parind lala-bar tha

burīda bāzuoñ meñ vo parind lāla-bār thā

shikāriyoñ ke ġhol meñ ajiib intishār thā

hare phaloñ ko toḌtī huī havā guzar ga.ī

bujhī bujhī fazā meñ har daraḳht sogvār thā

safar kā āḳhirī paḌāv aa gayā thā aur maiñ

jo ham-safar bichhaḌ rahe the un pe ashk-bār thā

ga.e the ham bhī bahr kī tahoñ meñ jhūmte hue

har ek siip ke laboñ meñ sirf regzār thā

dhulī dhulī fazā meñ ho ga.ī abas vo justujū

ki manzar-e-nazar-navāz to pas-e-ġhubār thā

dam-e-sahar na jaane jaane kaun aa gayā use

ravāñ the ashk añkhḌiyoñ se haath meñ sitār thā

jo vaqt aa gayā tamām tiir TūTte ga.e

usī na.ī kamāñ pe to mujhe bhī e'tibār thā

baras rahī thī aag is dayār-e-sañg meñ magar

mire lahū meñ gul-fishāñ vo champa.ī azaar thā

ajiib thī sarisht bhī hamāre dhaan paan kī

kabhī to bahr-e-be-karāñ kabhī sarāb-zār thā

burida bazuon mein wo parind lala-bar tha

shikariyon ke ghol mein ajib intishaar tha

hare phalon ko toDti hui hawa guzar gai

bujhi bujhi faza mein har daraKHt sogwar tha

safar ka aaKHiri paDaw aa gaya tha aur main

jo ham-safar bichhaD rahe the un pe ashk-bar tha

gae the hum bhi bahr ki tahon mein jhumte hue

har ek sip ke labon mein sirf regzar tha

dhuli dhuli faza mein ho gai abas wo justuju

ki manzar-e-nazar-nawaz to pas-e-ghubar tha

dam-e-sahar na jaane jaane kaun aa gaya use

rawan the ashk ankhDiyon se hath mein sitar tha

jo waqt aa gaya tamam tir TuTte gae

usi nai kaman pe to mujhe bhi e'tibar tha

baras rahi thi aag is dayar-e-sang mein magar

mere lahu mein gul-fishan wo champai azar tha

ajib thi sarisht bhi hamare dhan pan ki

kabhi to bahr-e-be-karan kabhi sarab-zar tha