burida-par the jasarat parind kya karte

burīda-par the jasārat parind kyā karte

havā se laḌne kī himmat parind kyā karte

paroñ ko taulā bahut yuuñ to ab kī rut meñ bhī

the aage barf ke parbat parind kyā karte

qafas se chhūT ke bhī āsmāñ kā ruḳh na kiyā

ki tark barsoñ kī 'ādat parind kyā karte

har ek tiir kā ruḳh thā unhīñ kī samt yahāñ

kisī se koī shikāyat parind kyā karte

haiñ dastaras meñ tirī tiir bhī havā.eñ bhī

tire ḳhilāf baġhāvat parind kyā karte

vo peḌ kaT ga.e jin par thā āshiyāñ un kā

agar na hotī mirī chhat parind kyā karte

huī giraft zarā Dhīlī kar ga.e parvāz

shikāriyoñ se muravvat parind kyā karte

fazā meñ chhā.ī thī hadd-e-nazar tak aag hī aag

uḌaan bharne kī jur.at parind kyā karte

chaman ko chhoḌ ke jaañ bach ga.ī ġhanīmat hai

'qamar' na karte jo hijrat parind kyā karte

burida-par the jasarat parind kya karte

hawa se laDne ki himmat parind kya karte

paron ko taula bahut yun to ab ki rut mein bhi

the aage barf ke parbat parind kya karte

qafas se chhuT ke bhi aasman ka ruKH na kiya

ki tark barson ki 'adat parind kya karte

har ek tir ka ruKH tha unhin ki samt yahan

kisi se koi shikayat parind kya karte

hain dastaras mein teri tir bhi hawaen bhi

tere KHilaf baghawat parind kya karte

wo peD kaT gae jin par tha aashiyan un ka

agar na hoti meri chhat parind kya karte

hui giraft zara Dhili kar gae parwaz

shikariyon se murawwat parind kya karte

faza mein chhai thi hadd-e-nazar tak aag hi aag

uDan bharne ki jurat parind kya karte

chaman ko chhoD ke jaan bach gai ghanimat hai

'qamar' na karte jo hijrat parind kya karte