burrish-e-tegh bhi hai phul ki mahkar bhi hai

burrish-e-teġh bhī hai phuul kī mahkār bhī hai

vo ḳhamoshī ki jo sad maujib-e-iz.hār bhī hai

chhoḌiye un ke shab-o-roz kī rūdād-e-zubūñ

aap ko ḳhāk-nashīnoñ se sarokār bhī hai

maslahat mujh ko bhī malhūz hai ai ham-suḳhano

par mire pesh-e-nazar vaqt kī raftār bhī hai

maut ke ḳhauf se har saañs rukī jaatī hai

zindagī aaj koī terā ḳharīdār bhī hai

talḳhī-e-hāl ko hai ishrat-e-fardā kā fareb

dil junūñ-kosh hai aur 'aql tarahdār bhī hai

mere mahbūb mujhe vaqf-e-taġhāful na samajh

ziist ke laakh taqāze haiñ terā pyaar bhī hai

ahl-e-guftār kī to bhiiḌ lagī hai 'aḳhtar'

dekhnā in meñ koī sāhab-e-kirdār bhī hai

burrish-e-tegh bhi hai phul ki mahkar bhi hai

wo KHamoshi ki jo sad maujib-e-izhaar bhi hai

chhoDiye un ke shab-o-roz ki rudad-e-zubun

aap ko KHak-nashinon se sarokar bhi hai

maslahat mujh ko bhi malhuz hai ai ham-suKHano

par mere pesh-e-nazar waqt ki raftar bhi hai

maut ke KHauf se har sans ruki jati hai

zindagi aaj koi tera KHaridar bhi hai

talKHi-e-haal ko hai ishrat-e-farda ka fareb

dil junun-kosh hai aur 'aql tarahdar bhi hai

mere mahbub mujhe waqf-e-taghaful na samajh

zist ke lakh taqaze hain tera pyar bhi hai

ahl-e-guftar ki to bhiD lagi hai 'aKHtar'

dekhna in mein koi sahab-e-kirdar bhi hai