bus ki ab zulf ka sauda bhi mere sar mein nahin

bus ki ab zulf kā saudā bhī mire sar meñ nahīñ

kyā karūñ maañg ke us ko jo muqaddar meñ nahīñ

vo bhī manzar thā ki ḳhud mujh meñ thā ik ik manzar

ye bhī manzar hai ki ab maiñ kisī manzar meñ nahīñ

ab jo ham ḳhud ko sameTeñ to sameTeñ kitnā

sar bhī hai apnā khulā paañv bhī chādar meñ nahīñ

ai mire shauq-e-shahādat tirā hāfiz hai ḳhudā

saḳht jaañ maiñ bhī huuñ aur dhaar bhī ḳhanjar meñ nahīñ

milne kī aas meñ kāñToñ pe bhī chal kar ḳhush thā

aur ab chain mujhe phūloñ ke bistar meñ nahīñ

ab mirī pyaas ke bujhne kā nahīñ koī savāl

ab mire naam kī sahbā kisī sāġhar meñ nahīñ

baat ye hai ki nazar tāb-e-nazar kho baiThī

ye nahīñ hai ki kashish ab kisī paikar meñ nahīñ

maiñ to sab kā huuñ rifāqat pe mirī sab ko hai naaz

koī merā hī magar mere bhare ghar meñ nahīñ

pur-tapāk aaj bhī milte haiñ na jaane kitne

lekin iḳhlās 'vaqār' in meñ se aksar meñ nahīñ

bus ki ab zulf ka sauda bhi mere sar mein nahin

kya karun mang ke us ko jo muqaddar mein nahin

wo bhi manzar tha ki KHud mujh mein tha ek ek manzar

ye bhi manzar hai ki ab main kisi manzar mein nahin

ab jo hum KHud ko sameTen to sameTen kitna

sar bhi hai apna khula panw bhi chadar mein nahin

ai mere shauq-e-shahadat tera hafiz hai KHuda

saKHt jaan main bhi hun aur dhaar bhi KHanjar mein nahin

milne ki aas mein kanTon pe bhi chal kar KHush tha

aur ab chain mujhe phulon ke bistar mein nahin

ab meri pyas ke bujhne ka nahin koi sawal

ab mere nam ki sahba kisi saghar mein nahin

baat ye hai ki nazar tab-e-nazar kho baiThi

ye nahin hai ki kashish ab kisi paikar mein nahin

main to sab ka hun rifaqat pe meri sab ko hai naz

koi mera hi magar mere bhare ghar mein nahin

pur-tapak aaj bhi milte hain na jaane kitne

lekin iKHlas 'waqar' in mein se aksar mein nahin