بت بے‌ درد کا غم مونس ہجراں نکلا

بت بے‌ درد کا غم مونس ہجراں نکلا

درد جانا تھا جسے ہم نے وہ درماں نکلا

آنکھ جب بند ہوئی تب کھلیں آنکھیں اپنی

بزم یاراں جسے سمجھے تھے وہ زنداں نکلا

حسرت و یاس کا انبوہ فغاں کی کثرت

میں تری بزم سے کیا با سر و ساماں نکلا

خون ہو کر تو یہ دل آنکھ سے برسوں ٹپکا

نہ کوئی پر دل ناکام کا ارماں نکلا

آئنہ پیکر تصویر نگاہ مشتاق

جسے دیکھا تری محفل میں وہ حیراں نکلا

مجھ کو حیرت ہے ہوا کیا دم رخصت ہمدم

جان نکلی مرے پہلو سے کہ جاناں نکلا

خوب دوزخ کی مصیبت سے بچے ہم حسرتؔ

اس کا داروغہ وہی یار کا درباں نکلا