but-kada nazdik kaba dur tha

but-kada nazdīk ka.aba duur thā

maiñ idhar hī rah gayā majbūr thā

shaam hī se ham kahīñ jaate the roz

muddatoñ apnā yahī dastūr thā

vo kiyā jis meñ ḳhushī thī aap kī

vo huā jo aap ko manzūr thā

kuchh adab se rah ga.e naale idhar

kyā batā.eñ arsh kitnī duur thā

jis ghaḌī thā us ke jalve kā zuhūr

arsh kā ham-sang koh-e-tūr thā

ik hasīñ kā aa gayā jo tazkira

der tak mahfil meñ zikr-e-hūr thā

vasl kī shab thī shab-e-me.arāj kyā

duur tak phailā huā ik nuur thā

har kas-o-nā-kas se kyā miltī nigāh

apnī āñkhoñ meñ but-e-maġhrūr thā

umr bhar fikr-e-suḳhan meñ thā 'hafīz'

shā.erī kā dil meñ ik nāsūr thā

but-kada nazdik kaba dur tha

main idhar hi rah gaya majbur tha

sham hi se hum kahin jate the roz

muddaton apna yahi dastur tha

wo kiya jis mein KHushi thi aap ki

wo hua jo aap ko manzur tha

kuchh adab se rah gae nale idhar

kya bataen arsh kitni dur tha

jis ghaDi tha us ke jalwe ka zuhur

arsh ka ham-sang koh-e-tur tha

ek hasin ka aa gaya jo tazkira

der tak mahfil mein zikr-e-hur tha

wasl ki shab thi shab-e-mearaj kya

dur tak phaila hua ek nur tha

har kas-o-na-kas se kya milti nigah

apni aankhon mein but-e-maghrur tha

umr bhar fikr-e-suKHan mein tha 'hafiz'

shaeri ka dil mein ek nasur tha