buto KHuda pe na rakkho moamla dil ka

buto ḳhudā pe na rakkho mo.āmla dil kā

burā-bhalā yahīñ ho jaa.e faisla dil kā

butoñ se hai muta.alliq mo.āmla dil kā

ḳhudā hai hashr meñ bhī ho jo faisla dil kā

chalo balā se agar hai ye āstīn kā saañp

baġhal meñ paal ke maiñ kyā karūñ gila dil kā

ḳhayāl-e-zulf meñ siine pe saañp loTte haiñ

dahān-e-mār kā chhālā hai aabla dil kā

sunūñ tumhārī ki apnī kahūñ haqīqat-e-hāl

tumheñ hai merī shikāyat mujhe gila dil kā

ḳhudā ye nāla-o-fariyād sāz-vār kare

ki dil-lagī hai hamārī ye mashġhala dil kā

bhaTak ke koī gayā dair ko koī ka.abe

ajiib bhūl-bhulayyāñ hai marhala dil kā

maiñ ishq-e-qad meñ alif khīñch kar huā huuñ faqīr

maiñ zulf-e-yār se rakhtā huuñ silsila dil kā

kisī ke zulf ne barham kiye haiñ hosh-o-havās

luTā hai shaam ke raste meñ qāfila dil kā

ḳhizāñ-rasīdoñ ko bāġh-o-bahār se kyā kaam

na ab vo josh-e-tabī.at na valvala dil kā

zamāna aur hai aubāshiyoñ kā vaqt nahīñ

na vo mizāj hamārā na hausla dil kā

ye kis sanam kī mohabbat meñ martaba paayā

huā jo arsh-e-ḳhudā se muqābla dil kā

kamāl yaar ke hāthoñ jalā huuñ meñ ai 'bahr'

hathelī kā hai phapholā ye aabla dil kā

buto KHuda pe na rakkho moamla dil ka

bura-bhala yahin ho jae faisla dil ka

buton se hai mutalliq moamla dil ka

KHuda hai hashr mein bhi ho jo faisla dil ka

chalo bala se agar hai ye aastin ka sanp

baghal mein pal ke main kya karun gila dil ka

KHayal-e-zulf mein sine pe sanp loTte hain

dahan-e-mar ka chhaala hai aabla dil ka

sunun tumhaari ki apni kahun haqiqat-e-haal

tumhein hai meri shikayat mujhe gila dil ka

KHuda ye nala-o-fariyaad saz-war kare

ki dil-lagi hai hamari ye mashghala dil ka

bhaTak ke koi gaya dair ko koi kabe

ajib bhul-bhulayyan hai marhala dil ka

main ishq-e-qad mein alif khinch kar hua hun faqir

main zulf-e-yar se rakhta hun silsila dil ka

kisi ke zulf ne barham kiye hain hosh-o-hawas

luTa hai sham ke raste mein qafila dil ka

KHizan-rasidon ko bagh-o-bahaar se kya kaam

na ab wo josh-e-tabiat na walwala dil ka

zamana aur hai aubashiyon ka waqt nahin

na wo mizaj hamara na hausla dil ka

ye kis sanam ki mohabbat mein martaba paya

hua jo arsh-e-KHuda se muqabla dil ka

kamal yar ke hathon jala hun mein ai 'bahr'

hatheli ka hai phaphola ye aabla dil ka