buto ye shisha-e-dil toD do KHuda ke liye

buto ye shīsha-e-dil toḌ do ḳhudā ke liye

jo sañg-dil ho to kyā chāhiye jafā ke liye

savāl yaar se kaisā kamāl-e-ulfat kā

ki ibtidā bhī to hai shart intihā ke liye

ḳhudā se tujh ko sanam māñgte to mil jaatā

magar adab ne ijāzat na dī duā ke liye

azāb-e-ātish-e-furqat se kāñptā thā dil

hazār shukr jahannam milā sazā ke liye

na dil lagā ke huā mujh se ishq meñ parhez

bigaḌ gayā jo kisī ne kahā davā ke liye

milā unheñ bhī talavvun mujhe bhī yak-rañgī

ḳhusūsiyat na rahī sarsar o sabā ke liye

ḳhudā ne kaam diye haiñ judā judā sab ko

sanam jafā ke liye haiñ to ham vafā ke liye

jahāñ-navard rahe ham talāsh-e-matlab meñ

chale na ek qadam ġhair-e-mudda.ā ke liye

mushā.ira meñ paḌho shauq se ġhazal 'bīmār'

ki musta.id haiñ suḳhan-sanj marhabā ke liye

buto ye shisha-e-dil toD do KHuda ke liye

jo sang-dil ho to kya chahiye jafa ke liye

sawal yar se kaisa kamal-e-ulfat ka

ki ibtida bhi to hai shart intiha ke liye

KHuda se tujh ko sanam mangte to mil jata

magar adab ne ijazat na di dua ke liye

azab-e-atish-e-furqat se kanpta tha dil

hazar shukr jahannam mila saza ke liye

na dil laga ke hua mujh se ishq mein parhez

bigaD gaya jo kisi ne kaha dawa ke liye

mila unhen bhi talawwun mujhe bhi yak-rangi

KHususiyat na rahi sarsar o saba ke liye

KHuda ne kaam diye hain juda juda sab ko

sanam jafa ke liye hain to hum wafa ke liye

jahan-naward rahe hum talash-e-matlab mein

chale na ek qadam ghair-e-muddaa ke liye

mushaira mein paDho shauq se ghazal 'bimar'

ki mustaid hain suKHan-sanj marhaba ke liye