buton ke ghar ki taraf kabe ke safar se phire

butoñ ke ghar kī taraf ka.abe ke safar se phire

hazār shukr ki jiite ḳhudā ke ghar se phire

marīz-e-hijr kā koī ilaaj kar dekhe

asar davā se davā hukm-e-chāra-gar se phire

mahīne bhar kā to rasta hai par duā ye hai

ki peshtar vo qamar daura-e-qamar se phire

nigāh-e-lutf se dekho shabāb aa jaa.e

shab-e-guzishta abhī gardish-e-nazar se phire

vo rashk-e-mahr jo saaqī ho umr baaqī ho

ziyāda sāġhar-e-mai charḳh-e-fitna-gar se phire

nigāh pherne meñ lutf kyā hai rahne do

ye tiir kis liye ulTā mire jigar se phire

kaheñge ba.ad-e-fanā ham se dostān-e-adam

bhare-pure ki tahī-dast is safar se phire

na māñgeñ bosa-e-ruḳhsār chhātiyāñ na chhueñ

tabī.at apnī jo ai but gul-o-samar se phire

falak ne kūcha-e-maqsad kī band kī rāheñ

bhalā batāo ki qismat mirī kidhar se phire

dikhā.e mauj-zanī bahr-e-ashk agar apnā

har āsiyā-e-falak-āb chashm-e-tar se phire

'munīr' ko hai vo daurān-e-sar ma.āz-allāh

ki sunñe vāloñ kā sar zikr-e-dard-e-sar se phire

buton ke ghar ki taraf kabe ke safar se phire

hazar shukr ki jite KHuda ke ghar se phire

mariz-e-hijr ka koi ilaj kar dekhe

asar dawa se dawa hukm-e-chaara-gar se phire

mahine bhar ka to rasta hai par dua ye hai

ki peshtar wo qamar daura-e-qamar se phire

nigah-e-lutf se dekho shabab aa jae

shab-e-guzishta abhi gardish-e-nazar se phire

wo rashk-e-mahr jo saqi ho umr baqi ho

ziyaada saghar-e-mai charKH-e-fitna-gar se phire

nigah pherne mein lutf kya hai rahne do

ye tir kis liye ulTa mere jigar se phire

kahenge baad-e-fana hum se dostan-e-adam

bhare-pure ki tahi-dast is safar se phire

na mangen bosa-e-ruKHsar chhatiyan na chhuen

tabiat apni jo ai but gul-o-samar se phire

falak ne kucha-e-maqsad ki band ki rahen

bhala batao ki qismat meri kidhar se phire

dikhae mauj-zani bahr-e-ashk agar apna

har aasiya-e-falak-ab chashm-e-tar se phire

'munir' ko hai wo dauran-e-sar maaz-allah

ki sunne walon ka sar zikr-e-dard-e-sar se phire