buton se humne ja ke iltija ki

butoñ se ham ne jā ke iltijā kī

baġhāvat ye ḳhudā se barmalā kī

fanā jab ho chukī kashtī hamārī

to phir āvāz aa.ī nāḳhudā kī

jhukā dī ye jabīñ har naqsh-e-pā par

ilāhī ḳhair mere dast-o-pā kī

ajab hai mere qātil kā ravayya

idhar to ḳhuuñ kiyā aur phir duā kī

raham khaao mire hāl-e-zabūñ par

qasam haañ haañ qasam tujh ko ḳhudā kī

mubārak sad-mubārak jo tujhe 'prem'

jafā ne shaan rakh lī hai vafā kī

buton se hum ne ja ke iltija ki

baghawat ye KHuda se barmala ki

fana jab ho chuki kashti hamari

to phir aawaz aai naKHuda ki

jhuka di ye jabin har naqsh-e-pa par

ilahi KHair mere dast-o-pa ki

ajab hai mere qatil ka rawayya

idhar to KHun kiya aur phir dua ki

raham khao mere haal-e-zabun par

qasam han han qasam tujh ko KHuda ki

mubarak sad-mubarak jo tujhe 'prem'

jafa ne shan rakh li hai wafa ki