bu-e-gul chahte hain raqs-e-saba chahte hain

bū-e-gul chāhte haiñ raqs-e-sabā chāhte haiñ

band kamroñ ke makīñ taaza havā chāhte haiñ

muflisī hosh uḌā detī hai insānoñ ke

ye nasha kam ho to daulat kā nasha chāhte haiñ

kab kahā ham ne kisī zohra-jabīñ kī hai talāsh

jo hameñ DhūñD sake us kā patā chāhte haiñ

ye bhī manzūr nahīñ chāñd ke bāshindoñ ko

ham ghanī raat meñ miTTī kā diyā chāhte haiñ

ham se nārāz haiñ sūraj kī shuā.eñ to raheñ

ham to bas raushnī-e-ġhār-e-hirā chāhte haiñ

sab ko miltā hai ye andāz-e-faqīrāna kahāñ

ham pareshāñ haiñ magar sab kā bhalā chāhte haiñ

jin kā sar dekh ke kaase kā gumāñ ho 'ma.asūm'

vo bhī is daur meñ dastār-e-anā chāhte haiñ

bu-e-gul chahte hain raqs-e-saba chahte hain

band kamron ke makin taza hawa chahte hain

muflisi hosh uDa deti hai insanon ke

ye nasha kam ho to daulat ka nasha chahte hain

kab kaha hum ne kisi zohra-jabin ki hai talash

jo hamein DhunD sake us ka pata chahte hain

ye bhi manzur nahin chand ke bashindon ko

hum ghani raat mein miTTi ka diya chahte hain

hum se naraaz hain suraj ki shuaen to rahen

hum to bas raushni-e-ghaar-e-hira chahte hain

sab ko milta hai ye andaz-e-faqirana kahan

hum pareshan hain magar sab ka bhala chahte hain

jin ka sar dekh ke kase ka guman ho 'masum'

wo bhi is daur mein dastar-e-ana chahte hain