bu-e-gul mauj par aati hai bahut raat gae

bū-e-gul mauj par aatī hai bahut raat ga.e

rūh-e-ehsās pe chhātī hai bahut raat ga.e

ġham kī purvā.ī sanaktī hai to har choT mirī

mo.ajiza apnā dikhātī hai bahut raat ga.e

ye bhī us nāz-e-taġhāful kā gila hai ai dil

aah jo hoñT pe aatī hai bahut raat ga.e

kaun rotā hai liye hāthoñ pe armān kī laash

ek āvāz sī aatī hai bahut raat ga.e

apnī āvāra mizājī ko duā detā huuñ

kū-ba-kū mujh ko phirātī hai bahut raat ga.e

ek nādīda ujāle kī tamannā meñ hayāt

apnī palkoñ ko sajātī hai bahut raat ga.e

shoḳhī jab rang pe aatī hai kisī kī 'nāzim'

dil kī tasvīr banātī hai bahut raat ga.e

bu-e-gul mauj par aati hai bahut raat gae

ruh-e-ehsas pe chhati hai bahut raat gae

gham ki purwai sanakti hai to har choT meri

moajiza apna dikhati hai bahut raat gae

ye bhi us naz-e-taghaful ka gila hai ai dil

aah jo honT pe aati hai bahut raat gae

kaun rota hai liye hathon pe arman ki lash

ek aawaz si aati hai bahut raat gae

apni aawara mizaji ko dua deta hun

ku-ba-ku mujh ko phiraati hai bahut raat gae

ek nadida ujale ki tamanna mein hayat

apni palkon ko sajati hai bahut raat gae

shoKHi jab rang pe aati hai kisi ki 'nazim'

dil ki taswir banati hai bahut raat gae