بوئے نسیم سے کبھی باد شمال سے

بوئے نسیم سے کبھی باد شمال سے

کسب نشاط کرتا ہوں تیرے جمال سے

جاں دادۂ لطافت ذکر حبیب کو

رغبت نہیں فسانۂ جاہ و جلال سے

اس حسن بے حجاب کی شادابیاں نہ پوچھ

گویا کہ بے نیاز ہے فکر مآل سے

یہ عیش کاش عشرت جاوید ہو سکے

پہلو میں دل دھڑکتا ہے خوف زوال سے

جل اٹھتے ہیں حسین دیے آرزؤں کے

ایوان غم میں آج بھی تیرے خیال سے

گہہ گہہ مٹاتا ہوں غم دوراں کی تلخیاں

یاقوت رنگ ہونٹوں کے آب زلال سے

مہتاب وش نکھرتی ہیں افسردہ شوخیاں

اس چہرۂ صبیح پہ عکس ملال سے