بوڑھے برگد پہ شام ہو گئی ہے

بوڑھے برگد پہ شام ہو گئی ہے

ایک دنیا تمام ہو گئی ہے

پڑ گیا ہے اداسیوں کا رواج

جس کی خلقت غلام ہو گئی ہے

اس گلے کے بٹن کھلے دو تین

روشنی بے نیام ہو گئی ہے

ہم رویوں پہ کام کر نہ سکے

آج تخریب عام ہو گئی ہے

دن بتایا تھا فکر فردا میں

رات ماضی کے نام ہو گئی ہے

اس گلی میں قیام ہے میرا

بے گھری بے مقام ہو گئی ہے

اس کے چھونے سے بھی ہرا نہ ہوا

یہ خزانی دوام ہو گئی ہے

آب زاروں پہ جم گئی کائی

زندگی تشنہ کام ہو گئی ہے

سانس آہستہ چل رہی ہے منیرؔ

موت کیوں تیز گام ہو گئی ہے