buDhe qissa-go ki sans ukhaDti thi

būḌhe qissa-go kī saañs ukhaḌtī thī

raat kī chhat pe niilī shabnam paḌtī thī

duur kahīñ the fēl-savār ḳhalā-zāde

raste meñ sūraj kī bastī paḌtī thī

baaġh meñ jādū-garnī ik ḳhurshīd-laqā

pahroñ apne husn pe ḳhuub akaḌtī thī

raat kaḌaktī barq kī dahshatnāk anī

aañkh kī putlī meñ jā jā ke gaḌtī thī

ik tājir-zādī se dil kā saudā thā

bante bante ik dam baat bigaḌtī thī

jannat ke haq-dāroñ ko is duniyā meñ

roTī bhī mushkil se puurī paḌtī thī

gorī ke sandūq meñ ummīdoñ ke biich

surḳh moshajjar kī poshāk sikuḌtī thī

aañkh khulī to jin thā aur na añgūThī

qismat apnā ḳhālī haath ragaḌtī thī

buDhe qissa-go ki sans ukhaDti thi

raat ki chhat pe nili shabnam paDti thi

dur kahin the feel-sawar KHala-zade

raste mein suraj ki basti paDti thi

bagh mein jadu-garni ek KHurshid-laqa

pahron apne husn pe KHub akaDti thi

raat kaDakti barq ki dahshatnak ani

aankh ki putli mein ja ja ke gaDti thi

ek tajir-zadi se dil ka sauda tha

bante bante ek dam baat bigaDti thi

jannat ke haq-daron ko is duniya mein

roTi bhi mushkil se puri paDti thi

gori ke sanduq mein ummidon ke bich

surKH moshajjar ki poshak sikuDti thi

aankh khuli to jin tha aur na anguThi

qismat apna KHali hath ragaDti thi