bund mein kaise chhupa rahta hai sagar dekho

buuñd meñ kaise chhupā rahtā hai sāgar dekho

apne ehsās ke dariyā meñ utar kar dekho

rotī phirtī hai vafā 'ishq meñ dar dar dekho

kitne ziyāda haiñ zamāne meñ sitamgar dekho

kaise aayā hai mere sar pe ye chhappar dekho

mere paapā kī hathelī ko bhī paḌh kar dekho

sar pe mālik ke na.e kapḌe kī chādar dekho

saarī duniyā ko banā kar use be-ghar dekho

saḳht koshish thī mirī tum raho dil meñ mere

kaise bikhrā hai tire ġham meñ merā ghar dekho

terī duniyā meñ sabhī ek barābar lekin

raushnī sab ko nahīñ miltī barābar dekho

maiñ tere 'ishq meñ be-bāt fanā ho baiThā

kaam aayā na tire dar ke merā sar dekho

bhāvnā kaun sī thī us ko maiñ samjhā hī nahīñ

shā'irī chūmtī hai sattā kī Thokar dekho

dekh kar merī nigāhoñ kī talab ko yaaro

paanī paanī huā jaatā hai samundar dekho

mujh se hotā to nahīñ terā bayāñ 'ishq kabhī

log kahne na lage mujh ko suḳhanvar dekho

saarī duniyā se fareboñ se adākārī se

jal na jaa.e kahīñ ehsās kā manzar dekho

bund mein kaise chhupa rahta hai sagar dekho

apne ehsas ke dariya mein utar kar dekho

roti phirti hai wafa 'ishq mein dar dar dekho

kitne ziyaada hain zamane mein sitamgar dekho

kaise aaya hai mere sar pe ye chhappar dekho

mere papa ki hatheli ko bhi paDh kar dekho

sar pe malik ke nae kapDe ki chadar dekho

sari duniya ko bana kar use be-ghar dekho

saKHt koshish thi meri tum raho dil mein mere

kaise bikhra hai tere gham mein mera ghar dekho

teri duniya mein sabhi ek barabar lekin

raushni sab ko nahin milti barabar dekho

main tere 'ishq mein be-baat fana ho baiTha

kaam aaya na tere dar ke mera sar dekho

bhawna kaun si thi us ko main samjha hi nahin

sha'iri chumti hai satta ki Thokar dekho

dekh kar meri nigahon ki talab ko yaro

pani pani hua jata hai samundar dekho

mujh se hota to nahin tera bayan 'ishq kabhi

log kahne na lage mujh ko suKHanwar dekho

sari duniya se farebon se adakari se

jal na jae kahin ehsas ka manzar dekho