bund pani ki hun thoDi si hawa hai mujh mein

buuñd paanī kī huuñ thoḌī sī havā hai mujh meñ

is bizā’at pe bhī kyā turfa anā hai mujh meñ

ye jo ik hashr shab-o-roz bapā hai mujh meñ

ho na ho aur bhī kuchh mere sivā hai mujh meñ

saf.ha-e-dahr pe ik raaz kī tahrīr huuñ maiñ

har koī paḌh nahīñ saktā jo likhā hai mujh meñ

kabhī shabnam kī latāfat kabhī sho'le kī lapak

lamha lamha ye badaltā huā kyā hai mujh meñ

shahr kā shahr ho jab 'arsa-e-mahshar kī tarah

kaun suntā hai jo kohrām machā hai mujh meñ

toḌ kar saaz ko sharminda-e-mizrāb na kar

ab na jhankār hai koī na sadā hai mujh meñ

vaqt ne kar diyā 'sābir' mujhe sahrā-ba-kanār

ik zamāne meñ samandar bhī bahā hai mujh meñ

bund pani ki hun thoDi si hawa hai mujh mein

is biza’at pe bhi kya turfa ana hai mujh mein

ye jo ek hashr shab-o-roz bapa hai mujh mein

ho na ho aur bhi kuchh mere siwa hai mujh mein

safha-e-dahr pe ek raaz ki tahrir hun main

har koi paDh nahin sakta jo likha hai mujh mein

kabhi shabnam ki latafat kabhi sho'le ki lapak

lamha lamha ye badalta hua kya hai mujh mein

shahr ka shahr ho jab 'arsa-e-mahshar ki tarah

kaun sunta hai jo kohram macha hai mujh mein

toD kar saz ko sharminda-e-mizrab na kar

ab na jhankar hai koi na sada hai mujh mein

waqt ne kar diya 'sabir' mujhe sahra-ba-kanar

ek zamane mein samandar bhi baha hai mujh mein