buzdil ya mazlum jahan mein kahlane se kya hoga

buzdil yā mazlūm jahāñ meñ kahlāne se kyā hogā

TuuTī hī shamshīr nikālo Dar jaane se kyā hogā

kab tak ye taqdīr kā ronā aao kuchh tadbīr kareñ

aañkh meñ aañsū chāk-e-garebāñ darshāne se kyā hogā

bhūke kī tum bhuuk miTāo to phir koī baat bane

shīsh-mahal ke ḳhvāb sunahre dikhlāne se kyā hogā

dhartī par sukh chain kī ḳhātir man ke mail ko saaf karo

gañgā jal meñ jism ko apne nahlāne se kyā hogā

ilm-o-hunar ko kaam meñ laao mustaqbil kī fikr karo

haal meñ maazī kī bhūloñ par pachhtāne se kyā hogā

maar ke Thokar rusvā.ī ko haq apnā le lo 'maqsūd'

bech ke ġhairat jām-e-muravvat chhalkāne se kyā hogā

buzdil ya mazlum jahan mein kahlane se kya hoga

TuTi hi shamshir nikalo Dar jaane se kya hoga

kab tak ye taqdir ka rona aao kuchh tadbir karen

aankh mein aansu chaak-e-gareban darshane se kya hoga

bhuke ki tum bhuk miTao to phir koi baat bane

shish-mahal ke KHwab sunahre dikhlane se kya hoga

dharti par sukh chain ki KHatir man ke mail ko saf karo

ganga jal mein jism ko apne nahlane se kya hoga

ilm-o-hunar ko kaam mein lao mustaqbil ki fikr karo

haal mein mazi ki bhulon par pachhtane se kya hoga

mar ke Thokar ruswai ko haq apna le lo 'maqsud'

bech ke ghairat jam-e-murawwat chhalkane se kya hoga