chaha bahut magar kisi unwan na kar sake

chāhā bahut magar kisī unvāñ na kar sake

īmāñ ko kufr kufr ko īmāñ na kar sake

afsos koī kār-e-numāyāñ na kar sake

qatre ko mauj mauj ko tūfāñ na kar sake

mumkin nahīñ ki himmat-e-mardāñ na kar sake

vo kaam kaun sā hai jo insāñ na kar sake

nāmūs-e-āshiqī kā junūñ meñ bhī thā lihāz

ham chaak fasl-e-gul meñ garebāñ na kar sake

tum ko kaheñ jo rashk-e-masīhā to kis tarah

tum bhī to mere dard kā darmāñ na kar sake

ḳhuddāriyoñ ke saath rahā ehtirām-e-husn

ham āshiqī ko jazba-e-arzāñ na kar sake

kam-asl chhup sakā na sharāfat ke bhes meñ

zarre ko āftāb-e-daraḳhshāñ na kar sake

dil par asar paḌe na kisī inqalāb kā

vo kījiye jo gardish-e-daurāñ na kar sake

karte haiñ log zikr-e-musāvāt kis liye

jab do tabī.atoñ ko bhī yaksāñ na kar sake

rakkhe vo bul-havas na qadam rāh-e-ishq meñ

jo ḳhud ko tere naam pe qurbāñ na kar sake

andesha-e-ma.āl thā goyā vabāl-e-jān

'tālib' ba-qadr-e-hausla armāñ na kar sake

chaha bahut magar kisi unwan na kar sake

iman ko kufr kufr ko iman na kar sake

afsos koi kar-e-numayan na kar sake

qatre ko mauj mauj ko tufan na kar sake

mumkin nahin ki himmat-e-mardan na kar sake

wo kaam kaun sa hai jo insan na kar sake

namus-e-ashiqi ka junun mein bhi tha lihaz

hum chaak fasl-e-gul mein gareban na kar sake

tum ko kahen jo rashk-e-masiha to kis tarah

tum bhi to mere dard ka darman na kar sake

KHuddariyon ke sath raha ehtiram-e-husn

hum aashiqi ko jazba-e-arzan na kar sake

kam-asl chhup saka na sharafat ke bhes mein

zarre ko aaftab-e-daraKHshan na kar sake

dil par asar paDe na kisi inqalab ka

wo kijiye jo gardish-e-dauran na kar sake

karte hain log zikr-e-musawat kis liye

jab do tabiaton ko bhi yaksan na kar sake

rakkhe wo bul-hawas na qadam rah-e-ishq mein

jo KHud ko tere nam pe qurban na kar sake

andesha-e-maal tha goya wabaal-e-jaan

'talib' ba-qadr-e-hausla arman na kar sake