chahat ghamze jata rahi hai

chāhat ġhamze jatā rahī hai

vahshat sahrā dikhā rahī hai

ġhunchoñ kā jigar hilā rahī hai

bulbul kyā gul khilā rahī hai

yūsuf kā patā lagā rahī hai

ḳhushbū kan.āñ meñ aa rahī hai

shīrīñ kyā rañg lā rahī hai

'āshiq kā lahū bahā rahī hai

kis shoḳh ko dījiye dil-e-zār

kis meñ sāhab vafā rahī hai

āvāza-e-faiz hai jahāñ meñ

jis kī shohrat sadā rahī hai

Daa.in hai parī-vashoñ kī furqat

dil khā ke kaleja khā rahī hai

jaañ nazr huī parī-ruḳhoñ kī

miTTī ko havā uḌā rahī hai

chāhat kī kashish ne lo Dubo dī

yūsuf ko kuñ.eñ jhukā rahī hai

dil meñ jo base hue haiñ gul-rū

surḳhī āñkhoñ meñ chhā rahī hai

gahtā huuñ jabīñ ko pā-e-but se

taqdīr likhā miTā rahī hai

hañste hue dekh kar guloñ ko

shabnam aañsū bahā rahī hai

andher kā aaj sāmnā hai

surma vo parī lagā rahī hai

kyuuñ jaan nahīñ nikaltī 'āġhā'

kaise sadme uThā rahī hai

chahat ghamze jata rahi hai

wahshat sahra dikha rahi hai

ghunchon ka jigar hila rahi hai

bulbul kya gul khila rahi hai

yusuf ka pata laga rahi hai

KHushbu kanan mein aa rahi hai

shirin kya rang la rahi hai

'ashiq ka lahu baha rahi hai

kis shoKH ko dijiye dil-e-zar

kis mein sahab wafa rahi hai

aawaza-e-faiz hai jahan mein

jis ki shohrat sada rahi hai

Dain hai pari-washon ki furqat

dil kha ke kaleja kha rahi hai

jaan nazr hui pari-ruKHon ki

miTTi ko hawa uDa rahi hai

chahat ki kashish ne lo Dubo di

yusuf ko kunen jhuka rahi hai

dil mein jo base hue hain gul-ru

surKHi aankhon mein chha rahi hai

gahta hun jabin ko pa-e-but se

taqdir likha miTa rahi hai

hanste hue dekh kar gulon ko

shabnam aansu baha rahi hai

andher ka aaj samna hai

surma wo pari laga rahi hai

kyun jaan nahin nikalti 'agha'

kaise sadme uTha rahi hai