chahat kahan kahan hai adawat kahan kahan

chāhat kahāñ kahāñ hai 'adāvat kahāñ kahāñ

maiñ jāntā huuñ mujh ko hai rāhat kahāñ kahāñ

karnī hai kis kī ziist meñ qīmat kahāñ kahāñ

pahchān kis kī kab hai zarūrat kahāñ kahāñ

kuchh apne dam bhī mushkiloñ kā hal nikāliye

māñgeñge rab se aap muravvat kahāñ kahāñ

sach jhuuT apnā jāntā hai ḳhud hī aadmī

chhoḌī hai us ne apnī sharāfat kahāñ kahāñ

dekhā jo tū ne pyaar kī nazroñ se ai sanam

mat pūchh huī jism meñ harakat kahāñ kahāñ

duniyā bharī huī hai hasīnoñ se dosto

dil kī kareñge aap hifāzat kahāñ kahāñ

kar lījiye qubūl vafā.eñ mirī sanam

DhūñDheñge aur jag meñ mohabbat kahāñ kahāñ

man-māniyoñ kī Thaan leñ jo hukmarān to

karte phireñge log baġhāvat kahāñ kahāñ

har vaqt āñkheñ muuñd ke chaltā hai jo bashar

'hīrā' karoge us ko nasīhat kahāñ kahāñ

chahat kahan kahan hai 'adawat kahan kahan

main jaanta hun mujh ko hai rahat kahan kahan

karni hai kis ki zist mein qimat kahan kahan

pahchan kis ki kab hai zarurat kahan kahan

kuchh apne dam bhi mushkilon ka hal nikaliye

mangenge rab se aap murawwat kahan kahan

sach jhuT apna jaanta hai KHud hi aadmi

chhoDi hai us ne apni sharafat kahan kahan

dekha jo tu ne pyar ki nazron se ai sanam

mat puchh hui jism mein harakat kahan kahan

duniya bhari hui hai hasinon se dosto

dil ki karenge aap hifazat kahan kahan

kar lijiye qubul wafaen meri sanam

DhunDhenge aur jag mein mohabbat kahan kahan

man-maniyon ki Than len jo hukmaran to

karte phirenge log baghawat kahan kahan

har waqt aankhen mund ke chalta hai jo bashar

'hira' karoge us ko nasihat kahan kahan