chahat ke ab ifsha-kun-e-asrar to hum hain

chāhat ke ab ifshā-kun-e-asrār to ham haiñ

kyuuñ dil se jhagaḌte ho gunahgār to ham haiñ

rū ā.īne ko dete ho bar-aks hamāre

ā.īna rakho tālib-e-dīdār to ham haiñ

gulshan meñ ajab jaate ho kar husn kī taz.īn

is jins-e-dil-ārā ke ḳharīdār to ham haiñ

kyā kabk ko dikhlāte ho andāz-e-ḳhirām aah

hasrat-zada-e-shoḳhi-e-raftār to ham haiñ

kī chashm sū-e-nargis-e-bīmār to phir kyā

is ain ināyat ke sazā-vār to ham haiñ

dil de ke dil-āzār ko kyā shikva-e-bedād

gar sochiye apne liye āzār to ham haiñ

jis din se phañse dekhī na phir shakl-e-rihā.ī

kyā kahiye 'nazīr' aise giraftār to ham haiñ

chahat ke ab ifsha-kun-e-asrar to hum hain

kyun dil se jhagaDte ho gunahgar to hum hain

ru aaine ko dete ho bar-aks hamare

aaina rakho talib-e-didar to hum hain

gulshan mein ajab jate ho kar husn ki tazin

is jins-e-dil-ara ke KHaridar to hum hain

kya kabk ko dikhlate ho andaz-e-KHiram aah

hasrat-zada-e-shoKHi-e-raftar to hum hain

ki chashm su-e-nargis-e-bimar to phir kya

is ain inayat ke saza-war to hum hain

dil de ke dil-azar ko kya shikwa-e-bedad

gar sochiye apne liye aazar to hum hain

jis din se phanse dekhi na phir shakl-e-rihai

kya kahiye 'nazir' aise giraftar to hum hain