چاہت کے زخم دل میں ہمیشہ چبھے رہے

چاہت کے زخم دل میں ہمیشہ چبھے رہے

آنکھوں میں تیری یاد کے آنسو بھرے رہے

مقصد حیات کا تھا تری سیر گلستاں

ہم تو بسیط صحرا میں تنہا کھڑے رہے

سب یہ سمجھ رہے تھے کہ یہ لالہ زار ہے

کانٹے ہمارے پاؤں میں ایسے چبھے رہے

ہم لڑکھڑا کے رہ گئے راہ حیات میں

لیکن وفا کی راہ میں پاؤں جمے رہے

روشن نہ ہو سکی کبھی یہ بزم زندگی

دل بھی بجھا رہا کبھی ہم بھی بجھے رہے

اب شوق آستاں ہی مشرفؔ نہیں مجھے

سجدے ہزار یوں تو جبیں میں چھپے رہے