chahaton ke KHwab ki tabir thi bilkul alag

chāhatoñ ke ḳhvāb kī ta.abīr thī bilkul alag

aur jiinā paḌ rahī hai zindagī bilkul alag

vo alag ehsās thā jab kashtiyāñ maujoñ meñ thiiñ

lag rahī hai ab kināre se nadī bilkul alag

aur kuchh mahrūmiyāñ bhī zindagī ke saath haiñ

har kamī se hai magar terī kamī bilkul alag

ek an-jānī sadā ne kyā pata kyā kah diyā

ruuTh kar baiThī hai sab se ḳhāmushī bilkul alag

lafz kī duniyā alag shahr-e-ma.ānī aur hai

maiñ alag huuñ mujh se merī shā'irī bilkul alag

aa.ine meñ muskurātā merā hī chehra magar

aa.ine se jhāñktī be-chehragī bilkul alag

sochtā huuñ rañg kitne haiñ mire kirdār meñ

maiñ kabhī apnī tarah huuñ aur kabhī bilkul alag

sab añdheroñ se judā dil kā añdherā jis tarah

har ujāle se hai ghar kī raushnī bilkul alag

zindagī kī lai bikharne kā sabab shāyad yahī

saaz kī dhun se hai merī naġhmagī bilkul alag

mujh ko in sairābiyoñ ne ek sahrā kar diyā

aaj bhī lekin hai merī tishnagī bilkul alag

chahaton ke KHwab ki tabir thi bilkul alag

aur jina paD rahi hai zindagi bilkul alag

wo alag ehsas tha jab kashtiyan maujon mein thin

lag rahi hai ab kinare se nadi bilkul alag

aur kuchh mahrumiyan bhi zindagi ke sath hain

har kami se hai magar teri kami bilkul alag

ek an-jaani sada ne kya pata kya kah diya

ruTh kar baiThi hai sab se KHamushi bilkul alag

lafz ki duniya alag shahr-e-maani aur hai

main alag hun mujh se meri sha'iri bilkul alag

aaine mein muskuraata mera hi chehra magar

aaine se jhankti be-chehragi bilkul alag

sochta hun rang kitne hain mere kirdar mein

main kabhi apni tarah hun aur kabhi bilkul alag

sab andheron se juda dil ka andhera jis tarah

har ujale se hai ghar ki raushni bilkul alag

zindagi ki lai bikharne ka sabab shayad yahi

saz ki dhun se hai meri naghmagi bilkul alag

mujh ko in sairabiyon ne ek sahra kar diya

aaj bhi lekin hai meri tishnagi bilkul alag