chahe hamara zikr kisi bhi zaban mein ho

chāhe hamārā zikr kisī bhī zabāñ meñ ho

kuchh hasratoñ kī baat bhī rasm-e-bayāñ meñ ho

aa.e to is vaqār se ab ke azāb-e-hijr

sharminda ye bahār bhī ab ke ḳhizāñ meñ ho

rakkhā hai zindagī ko bhī har haal meñ aziiz

jab ki azāb-e-zīst bhī apne gumāñ meñ ho

niklūñ tirī talāsh meñ jab āsamān par

sadma mire ḳhayāl ko donoñ jahāñ meñ ho

rasm-e-junūñ kā baab hai avval o āḳhirī

likkhā nisāb-e-dil to kisī bhī zabāñ meñ ho

ye terā husn-e-zan thā ki dil kaam aa gayā

varna to is kā zikr bhī kār-e-ziyāñ meñ ho

kuchh log the safar meñ magar ham-zabāñ na the

hai lutf guftugū kā jo apnī zabāñ meñ ho

baiThā huuñ duur saa.e se is vāste 'sa.īd'

āsūdgī safar kī usī imtihāñ meñ ho

chahe hamara zikr kisi bhi zaban mein ho

kuchh hasraton ki baat bhi rasm-e-bayan mein ho

aae to is waqar se ab ke azab-e-hijr

sharminda ye bahaar bhi ab ke KHizan mein ho

rakkha hai zindagi ko bhi har haal mein aziz

jab ki azab-e-zist bhi apne guman mein ho

niklun teri talash mein jab aasaman par

sadma mere KHayal ko donon jahan mein ho

rasm-e-junun ka bab hai awwal o aaKHiri

likkha nisab-e-dil to kisi bhi zaban mein ho

ye tera husn-e-zan tha ki dil kaam aa gaya

warna to is ka zikr bhi kar-e-ziyan mein ho

kuchh log the safar mein magar ham-zaban na the

hai lutf guftugu ka jo apni zaban mein ho

baiTha hun dur sae se is waste 'said'

aasudgi safar ki usi imtihan mein ho