chahe jo haal bhi ho unki nazar hone tak

chāhe jo haal bhī ho un kī nazar hone tak

ham jiye jā.eñge aahoñ meñ asar hone tak

be-ḳhudī naam hai ehsās-e-ḳhudī kā shāyad

varna kuchh aur thā mansūr ḳhabar hone tak

sabr se kaam le ai dil is añdhere se na Dar

zulmat-e-shab hai sapedī-e-sahar hone tak

jab jo chāheñ vo kaheñ apne ko vaa.iz lekin

bartarī mujh ko to hāsil hai bashar hone tak

haa.e vo husn-e-yaqīñ aah vo ummīd-e-karam

muntazir thā tirā bīmār sahar hone tak

yuuñ to jiinā hai ba-har-hāl magar ai 'āsī'

zindagī asl meñ hai soz-e-jigar hone tak

chahe jo haal bhi ho un ki nazar hone tak

hum jiye jaenge aahon mein asar hone tak

be-KHudi nam hai ehsas-e-KHudi ka shayad

warna kuchh aur tha mansur KHabar hone tak

sabr se kaam le ai dil is andhere se na Dar

zulmat-e-shab hai sapedi-e-sahar hone tak

jab jo chahen wo kahen apne ko waiz lekin

bartari mujh ko to hasil hai bashar hone tak

hae wo husn-e-yaqin aah wo ummid-e-karam

muntazir tha tera bimar sahar hone tak

yun to jina hai ba-har-haal magar ai 'asi'

zindagi asl mein hai soz-e-jigar hone tak