چاہنے کی نہ انتہا رکھئے

چاہنے کی نہ انتہا رکھئے

جان سے بھی اسے سوا رکھئے

عشق کرنے کا گر ارادہ ہو

گھر لٹانے کا حوصلہ رکھئے

پھول مہکیں گے اس کی یادوں کے

تازہ یادوں کا سلسلہ رکھئے

کوئی بھی رت ہو کوئی موسم ہو

زخم دل کا ہرا بھرا رکھئے

یہ پری زادگاں ہیں شعلہ نژاد

ان سے ملیے تو فاصلہ رکھئے

خیمۂ جاں یہ خوف شب خوں ہے

کم سے کم خود کو جاگتا رکھیے

بھول جائیں ہر ایک قصے کو

یاد لیکن وہ حادثہ رکھیے

ہر جگہ سے زمیں سرکتی ہے

پاؤں رکھیے تو کس جگہ رکھیے

ہر مہم میں بشرط پسپائی

واپسی کا بھی راستہ رکھئے

شاعروں اور گداگروں میں آپ

فرق تھوڑا سا تو روا رکھیے

جو بھی کرنا ہے آج کر لیجے

کام فردا پہ کیا اٹھا رکھئے

کوئی آئے نہ آئے دل میں عظیمؔ

دل کا دروازہ پر کھلا رکھئے