چاہتا جیسا ہوں ویسا نہیں ہونے دیتا

چاہتا جیسا ہوں ویسا نہیں ہونے دیتا

آئنہ مجھ کو اکیلا نہیں ہونے دیتا

ایک رشتہ ہے بہت دن سے تعاقب میں مرے

میرا سایہ مجھے تنہا نہیں ہونے دیتا

پردۂ شب سے نکلنے کا نہیں لیتا نام

آج سورج ہی سویرا نہیں ہونے دیتا

اسی اک بوند میں خود ڈوب نہ جائے وہ کہیں

ایک قطرے کو جو دریا نہیں ہونے دیتا

یہ رویہ ہے بہر حال محبت کی دلیل

زخم دیتا ہے تو گہرا نہیں ہونے دیتا

بال و پر مجھ کو میسر تو کئے ہیں اس نے

اس طبیعت کو پرندہ نہیں ہونے دیتا

روز ملتا ہے قمرؔ ٹوٹ کے مجھ سے لیکن

اپنے اندر کوئی در وا نہیں ہونے دیتا