chahun to abhi hijr ke haalat bata dun

chāhūñ to abhī hijr ke hālāt batā duuñ

phir kyā hai tire vasl kī auqāt batā duuñ

samjhe hai to bas mere zavāhir ke ishāre

maiñ apne pe aa.uuñ to tirī zaat batā duuñ

vo raaz jo kholegā zavāhir kī haqīqat

tū bole batā duuñ to maiñ vo baat batā duuñ

paḌh saktā huuñ maiñ jald kitāb-e-ruḳh-e-raushan

chāhūñ to mazāmīn-e-maqālāt batā duuñ

sajdoñ ko mire nashr-o-ishā.at kā nahīñ shauq

kyuuñ ġhair ko taḳhsīs-e-ibādāt batā duuñ

dushman ko to rakkhūñgā maiñ mastūr-e-zamāna

mumkin hai kabhī apne muhimmāt batā duuñ

maiñ bhī tire hisse kā safar kartā rahā huuñ

ab aur tujhe kaun sī sauġhāt batā duuñ

tajdīd-e-tafakkur kā tujhe vahm huā hai

maiñ tere ḳhayāloñ meñ tazādāt batā duuñ

phir jaan gayā tere latīfāna suḳhan ko

phir kyā hai tirā rāz-e-mudārāt batā duuñ

maḳhmūr hai mad.hosh hai duniyā mire aage

kuchh aur bhī haiñ is ke ḳhurāfāt batā duuñ

taqdīr hī kuchh apnī maTar-gasht kiye hai

'tamjīd' ye mumkin hai mahālāt batā duuñ

chahun to abhi hijr ke haalat bata dun

phir kya hai tere wasl ki auqat bata dun

samjhe hai to bas mere zawahir ke ishaare

main apne pe aaun to teri zat bata dun

wo raaz jo kholega zawahir ki haqiqat

tu bole bata dun to main wo baat bata dun

paDh sakta hun main jald kitab-e-ruKH-e-raushan

chahun to mazamin-e-maqalat bata dun

sajdon ko mere nashr-o-ishaat ka nahin shauq

kyun ghair ko taKHsis-e-ibaadat bata dun

dushman ko to rakkhunga main mastur-e-zamana

mumkin hai kabhi apne muhimmat bata dun

main bhi tere hisse ka safar karta raha hun

ab aur tujhe kaun si saughat bata dun

tajdid-e-tafakkur ka tujhe wahm hua hai

main tere KHayalon mein tazadat bata dun

phir jaan gaya tere latifana suKHan ko

phir kya hai tera raaz-e-mudaraat bata dun

maKHmur hai madhosh hai duniya mere aage

kuchh aur bhi hain is ke KHurafat bata dun

taqdir hi kuchh apni maTar-gasht kiye hai

'tamjid' ye mumkin hai mahaalat bata dun