chaak daman bhi hua chaak-e-gareban ki tarah

chaak dāman bhī huā chāk-e-garebāñ kī tarah

aañkh barse hai shab-e-ġham abr-e-bārāñ kī tarah

vaa.e qismat chhā ga.ī ḳhāmoshī dil meñ kis qadar

bujh gayā huuñ maiñ charāġh-e-gor-e-vīrāñ kī tarah

us gul-e-rā.anā kī ulfat chhup nahīñ saktī kabhī

ubhrā hai dāġh-e-vafā mehr-e-daraḳhshāñ kī tarah

hai karāmat ishq kī pahuñchā maiñ bām-e-arsh tak

goyā ik darvesh huuñ maiñ ahl-e-irfāñ kī tarah

in ke va.ade ne mujhe baḳhshā hai zauq-e-zindagī

khil gayā dil ġhuncha-e-jashn-e-bahārāñ kī tarah

pūchh mat mujh se hai kaisī lazzat-e-soz-e-darūñ

jāñ-gudāzī hai mirī sham-e-farozāñ kī tarah

ghar nahīñ daulat nahīñ hurmat nahīñ satvat nahīñ

ham bhī kyā āvāra haiñ gardūn-e-gardāñ kī tarah

mahfil-e-yārāñ nahīñ bazm-e-bahārāñ bhī nahīñ

ham jiye haiñ sākin-e-shahr-e-ḳhamoshāñ kī tarah

bekasī chashm-e-falak ne dam-ba-dam dekhī mirī

duniyā meñ aajiz kahāñ mujh ḳhāna-vīrāñ kī tarah

afsar-e-ḳhūbāñ 'jalālī' Thahrā hai jab se koī

gulshan-e-dil zebā hai firdaus-e-rizvāñ kī tarah

chaak daman bhi hua chaak-e-gareban ki tarah

aankh barse hai shab-e-gham abr-e-baran ki tarah

wae qismat chha gai KHamoshi dil mein kis qadar

bujh gaya hun main charagh-e-gor-e-viran ki tarah

us gul-e-raana ki ulfat chhup nahin sakti kabhi

ubhra hai dagh-e-wafa mehr-e-daraKHshan ki tarah

hai karamat ishq ki pahuncha main baam-e-arsh tak

goya ek darwesh hun main ahl-e-irfan ki tarah

in ke wade ne mujhe baKHsha hai zauq-e-zindagi

khil gaya dil ghuncha-e-jashn-e-bahaaran ki tarah

puchh mat mujh se hai kaisi lazzat-e-soz-e-darun

jaan-gudazi hai meri sham-e-farozan ki tarah

ghar nahin daulat nahin hurmat nahin satwat nahin

hum bhi kya aawara hain gardun-e-gardan ki tarah

mahfil-e-yaran nahin bazm-e-bahaaran bhi nahin

hum jiye hain sakin-e-shahr-e-KHamoshan ki tarah

bekasi chashm-e-falak ne dam-ba-dam dekhi meri

duniya mein aajiz kahan mujh KHana-viran ki tarah

afsar-e-KHuban 'jalali' Thahra hai jab se koi

gulshan-e-dil zeba hai firdaus-e-rizwan ki tarah