چاک دل میں ہے سلامت ہے گریباں میرا

چاک دل میں ہے سلامت ہے گریباں میرا

کون سمجھے گا الٰہی غم پنہاں میرا

پہلے یہ تھا کہ غم ان کا دل ویراں میرا

اب میں اپنا ہوں نہ دل ہے کسی عنواں میرا

تنگ دامن ہوں مگر دامن دل تنگ نہیں

ہے مری حوصلہ مندی سر و ساماں میرا

آج ذرات چمن بھی نہیں واقف مجھ سے

تھا کبھی نام گلستاں بہ گلستاں میرا

ہر نفس نغمۂ بے تابیٔ غم جاری ہے

چھیڑے جاتا ہے کوئی ساز رگ جاں میرا

رخصت اے صحبت مے خانہ پھر آ جاؤں گا

راستہ دیکھتی ہے گردش دوراں میرا

قید ہوں اپنے خیالات کی زنجیروں میں

بن گیا ہے مرا احساس ہی زنداں میرا

اپنی بے نام اداؤں کو بچائے رکھیے

یہ نہ بن جائیں کہیں حال پریشاں میرا

دل کی دشوار پسندی کو دعا دیتا ہوں

کام مشکل سے ہوا کرتا ہے آساں میرا

میرے افکار کی خوشبو ہے کئی پھولوں میں

ہر گلستاں نظر آتا ہے گلستاں میرا

پاس آداب محبت مجھے شوقؔ اتنا ہے

چاک ہونے نہیں پاتا ہے گریباں میرا