chaak dil mein hai salamat hai gareban mera

chaak dil meñ hai salāmat hai garebāñ merā

kaun samjhegā ilāhī ġham-e-pinhāñ merā

pahle ye thā ki ġham un kā dil-e-vīrāñ merā

ab maiñ apnā huuñ na dil hai kisī unvāñ merā

tañg dāman huuñ magar dāman-e-dil tañg nahīñ

hai mirī hausla-mandī sar-o-sāmāñ merā

aaj zarrāt-e-chaman bhī nahīñ vāqif mujh se

thā kabhī naam gulistāñ-ba-gulistāñ merā

har nafas naġhma-e-be-tābī-e-ġham jaarī hai

chheḌe jaatā hai koī sāz-e-rag-e-jāñ merā

ruḳhsat ai sohbat-e-mai-ḳhāna phir aa jā.ūñgā

rāsta dekhtī hai gardish-e-daurāñ merā

qaid huuñ apne ḳhayālāt kī zanjīroñ meñ

ban gayā hai mirā ehsās hī zindāñ merā

apnī be-nām adāoñ ko bachā.e rakhiye

ye na ban jaa.eñ kahīñ hāl-e-pareshāñ merā

dil kī dushvār-pasandī ko duā detā huuñ

kaam mushkil se huā kartā hai āsāñ merā

mere afkār kī ḳhushbū hai ka.ī phūloñ meñ

har gulistāñ nazar aatā hai gulistāñ merā

pās-e-ādāb-e-mohabbat mujhe 'shauq' itnā hai

chaak hone nahīñ paatā hai garebāñ merā

chaak dil mein hai salamat hai gareban mera

kaun samjhega ilahi gham-e-pinhan mera

pahle ye tha ki gham un ka dil-e-viran mera

ab main apna hun na dil hai kisi unwan mera

tang daman hun magar daman-e-dil tang nahin

hai meri hausla-mandi sar-o-saman mera

aaj zarraat-e-chaman bhi nahin waqif mujh se

tha kabhi nam gulistan-ba-gulistan mera

har nafas naghma-e-be-tabi-e-gham jari hai

chheDe jata hai koi saz-e-rag-e-jaan mera

ruKHsat ai sohbat-e-mai-KHana phir aa jaunga

rasta dekhti hai gardish-e-dauran mera

qaid hun apne KHayalat ki zanjiron mein

ban gaya hai mera ehsas hi zindan mera

apni be-nam adaon ko bachae rakhiye

ye na ban jaen kahin haal-e-pareshan mera

dil ki dushwar-pasandi ko dua deta hun

kaam mushkil se hua karta hai aasan mera

mere afkar ki KHushbu hai kai phulon mein

har gulistan nazar aata hai gulistan mera

pas-e-adab-e-mohabbat mujhe 'shauq' itna hai

chaak hone nahin pata hai gareban mera