chaak-e-daman se gareban aur kitni dur hai

chāk-e-dāman se garebāñ aur kitnī duur hai

ai mirī vahshat bayābāñ aur kitnī duur hai

ai shab-e-ġham gardish-e-ayyām kī tujh ko qasam

kuchh batā sub.h-e-bahārāñ aur kitnī duur hai

aa gayā huuñ sarhad-e-imkān tak le kar lahū

jaane ab sehn-e-gulistāñ aur kitnī duur hai

āzmā.ish se guzartā jā rahā huuñ josh meñ

kyā pata dariyā-e-imkāñ aur kitnī duur hai

bosa-e-zanjīr merī āḳhirī manzil hai ab

dekhtā huuñ mujh se zindāñ aur kitnī duur hai

maiñ mashaqqat kar rahā huuñ ab zamīn-e-dil pe bhī

vo tirā aks-e-farozāñ aur kitnī duur hai

ruuh kī tathīr kar ke dekhte jaanā 'tarāz'

matla-e-anvār-e-irfāñ aur kitnī duur hai

chaak-e-daman se gareban aur kitni dur hai

ai meri wahshat bayaban aur kitni dur hai

ai shab-e-gham gardish-e-ayyam ki tujh ko qasam

kuchh bata subh-e-bahaaran aur kitni dur hai

aa gaya hun sarhad-e-imkan tak le kar lahu

jaane ab sehn-e-gulistan aur kitni dur hai

aazmaish se guzarta ja raha hun josh mein

kya pata dariya-e-imkan aur kitni dur hai

bosa-e-zanjir meri aaKHiri manzil hai ab

dekhta hun mujh se zindan aur kitni dur hai

main mashaqqat kar raha hun ab zamin-e-dil pe bhi

wo tera aks-e-farozan aur kitni dur hai

ruh ki tathir kar ke dekhte jaana 'taraaz'

matla-e-anwar-e-irfan aur kitni dur hai