chaak-e-jigar-o-dil ka jab shikwa baja hota

chāk-e-jigar-o-dil kā jab shikva bajā hotā

yūsuf kā zuleḳhā ne dāman to siyā hotā

sahtā huuñ sitam us ke ehsān hai duniyā par

gar maiñ na vafā kartā kyā jāniye kyā hotā

tum aur adū donoñ ik jaan do qālib ho

maiñ tum se agar miltā vo kyuuñ ki judā hotā

mahrūmī-e-tāle.a se hogā na ye din varna

maiñ tum ko dikhā detā gar roz-e-jazā hotā

yaañ tark-e-vafā mushkil tum kyuuñ ki sitam chhoḌo

jo kuchh na huā mujh se vo aap se kyā hotā

ai kaash tum aa jaate aġhyār hī ko le kar

kuchh umr to ghaT jaatī go rañj sivā hotā

karte haiñ vo chaar āñkheñ yuuñ mil ke qayāmat meñ

goyā ki hai fardā kā ab va.ada vafā hotā

dhoke meñ na rahnā thā yakbār na kahnā thā

kuchh lab pe gilā laate kuchh dil meñ rakhā hotā

hotī hai shab-e-va.ada jab yaas to maiñ dil se

nā-chār ye kahtā huuñ vo aate to kyā hotā

mai-ḳhāne se mai 'sālik' piite hue ghar jaanā

bāzār hai ye hazrat kuchh paas kiyā hotā

chaak-e-jigar-o-dil ka jab shikwa baja hota

yusuf ka zuleKHa ne daman to siya hota

sahta hun sitam us ke ehsan hai duniya par

gar main na wafa karta kya jaaniye kya hota

tum aur adu donon ek jaan do qalib ho

main tum se agar milta wo kyun ki juda hota

mahrumi-e-talea se hoga na ye din warna

main tum ko dikha deta gar roz-e-jaza hota

yan tark-e-wafa mushkil tum kyun ki sitam chhoDo

jo kuchh na hua mujh se wo aap se kya hota

ai kash tum aa jate aghyar hi ko le kar

kuchh umr to ghaT jati go ranj siwa hota

karte hain wo chaar aankhen yun mil ke qayamat mein

goya ki hai farda ka ab wada wafa hota

dhoke mein na rahna tha yakbar na kahna tha

kuchh lab pe gila late kuchh dil mein rakha hota

hoti hai shab-e-wada jab yas to main dil se

na-chaar ye kahta hun wo aate to kya hota

mai-KHane se mai 'salik' pite hue ghar jaana

bazar hai ye hazrat kuchh pas kiya hota