چاک ہر عہد میں ظلمت کی ردا ہم سے ہوئی

چاک ہر عہد میں ظلمت کی ردا ہم سے ہوئی

امن کی صبح جہاں میں بخدا ہم سے ہوئی

حق کو حق کہنا اگر جرم ہمارا ٹھہرا

ہم کو تسلیم کہ ہاں یہ بھی خطا ہم سے ہوئی

جرم اتنا ہے کہ توڑے ہیں بتوں کے پیکر

نفرت آگیں جو زمانے کی ہوا ہم سے ہوئی

سر جھکایا ہی نہیں ہم نے در حق کے سوا

اس لیے قوت باطل بھی خفا ہم سے ہوئی

ہم نے ہر دل میں جلائے ہیں صداقت کے دیے

کفر و ظلمت میں بھی یہ رسم ادا ہم سے ہوئی

ہم نے ہنستے ہوئے پھولوں پہ ستم ڈھائے ہیں

اور اس ظلم کی غماز صبا ہم سے ہوئی

یہ اولو العزمی و حق گوئی سدا بے باکی

زیر شمشیر بھی یہ رسم ادا ہم سے ہوئی

خاک اور خون میں لپٹی ہوئی خاموش زباں

شہر بیداد میں بھی داد رسا ہم سے ہوئی

جب بھی خوں بار بہاریں یہاں آئیں بسملؔ

فصل گل رقص کناں جلوہ نما ہم سے ہوئی