chaak har ahd mein zulmat ki rida humse hui

chaak har 'ahd meñ zulmat kī ridā ham se huī

amn kī sub.h jahāñ meñ ba-ḳhudā ham se huī

haq ko haq kahnā agar jurm hamārā Thahrā

ham ko taslīm ki haañ ye bhī ḳhatā ham se huī

jurm itnā hai ki toḌe haiñ butoñ ke paikar

nafrat-āgīñ jo zamāne kī havā ham se huī

sar jhukāyā hī nahīñ ham ne dar-e-haq ke sivā

is liye quvvat-e-bātil bhī ḳhafā ham se huī

ham ne har dil meñ jalā.e haiñ sadāqat ke diye

kufr-o-zulmat meñ bhī ye rasm adā ham se huī

ham ne hañste hue phūloñ pe sitam Dhaa.e haiñ

aur is zulm kī ġhammāz sabā ham se huī

ye ulul-'azmī-o-haq-goī sadā bebākī

zer-e-shamshīr bhī ye rasm adā ham se huī

ḳhaak aur ḳhuun meñ lipTī huī ḳhāmosh zabāñ

shahr-e-bedād meñ bhī dād-rasā ham se huī

jab bhī ḳhūñ-bār bahāreñ yahāñ aa.iiñ 'bismil'

fasl-e-gul raqs-kunāñ jalva-numā ham se huī

chaak har 'ahd mein zulmat ki rida hum se hui

amn ki subh jahan mein ba-KHuda hum se hui

haq ko haq kahna agar jurm hamara Thahra

hum ko taslim ki han ye bhi KHata hum se hui

jurm itna hai ki toDe hain buton ke paikar

nafrat-agin jo zamane ki hawa hum se hui

sar jhukaya hi nahin hum ne dar-e-haq ke siwa

is liye quwwat-e-baatil bhi KHafa hum se hui

hum ne har dil mein jalae hain sadaqat ke diye

kufr-o-zulmat mein bhi ye rasm ada hum se hui

hum ne hanste hue phulon pe sitam Dhae hain

aur is zulm ki ghammaz saba hum se hui

ye ulul-'azmi-o-haq-goi sada bebaki

zer-e-shamshir bhi ye rasm ada hum se hui

KHak aur KHun mein lipTi hui KHamosh zaban

shahr-e-bedad mein bhi dad-rasa hum se hui

jab bhi KHun-bar bahaaren yahan aain 'bismil'

fasl-e-gul raqs-kunan jalwa-numa hum se hui