chaak ho parda-e-wahshat mujhe manzur nahin

chaak ho parda-e-vahshat mujhe manzūr nahīñ

varna ye haath garebān se kuchh duur nahīñ

sajde karne se miTā ḳhatt-e-jabīñ ai zāhid

ham kahe dete haiñ qismat meñ tirī huur nahīñ

mohtasib māne'-e-'illat hai gumān-e-mai se

sūñghne ko bhī mayassar mujhe angūr nahīñ

lab tak aa.ī thī shikāyat ki mohabbat ne kahā

dekh pachhtā.egā ḳhāmosh ye dastūr nahīñ

raat din nāma-o-paiġhām kahāñ tak hoñge

saaf kah dījiye milnā hameñ manzūr nahīñ

tum ne dī kohkan-o-qais se mujh ko nisbat

koī dīvāna nahīñ maiñ koī mazdūr nahīñ

kyā kare 'dāġh' koī us kī mohabbat kā ilaaj

vo kaleja hī nahīñ jis meñ ye nāsūr nahīñ

chaak ho parda-e-wahshat mujhe manzur nahin

warna ye hath gareban se kuchh dur nahin

sajde karne se miTa KHatt-e-jabin ai zahid

hum kahe dete hain qismat mein teri hur nahin

mohtasib mane'-e-'illat hai guman-e-mai se

sunghne ko bhi mayassar mujhe angur nahin

lab tak aai thi shikayat ki mohabbat ne kaha

dekh pachhtaega KHamosh ye dastur nahin

raat din nama-o-paigham kahan tak honge

saf kah dijiye milna hamein manzur nahin

tum ne di kohkan-o-qais se mujh ko nisbat

koi diwana nahin main koi mazdur nahin

kya kare 'dagh' koi us ki mohabbat ka ilaj

wo kaleja hi nahin jis mein ye nasur nahin