chaak pe rakkhe hain taswir bana di jae

chaak pe rakkhe haiñ tasvīr banā dī jaa.e

varna us jagah se ye miTTī haTā dī jaa.e

tum ne kyā soch ke rakkhā hai yahāñ kūza-garo

gar nahīñ Dhālnā to vaj.h batā dī jaa.e

rañg-o-ḳhushbū to azal se mirī kamzorī hai

sabz mausam se mirī duniyā sajā dī jaa.e

ho gayā kūcha-e-tohmat meñ to jiinā mushkil

jurm kī ab to sazā ham ko sunā dī jaa.e

ā.ina-ḳhāne meñ hairān se sab baiThe haiñ

in zamīñ-zādoñ kī hairat hī miTā dī jaa.e

faisla paar utarne kā kiyā hai 'shahnāz'

ab zarā āḳhirī kashtī bhī jalā dī jaa.e

chaak pe rakkhe hain taswir bana di jae

warna us jagah se ye miTTi haTa di jae

tum ne kya soch ke rakkha hai yahan kuza-garo

gar nahin Dhaalna to wajh bata di jae

rang-o-KHushbu to azal se meri kamzori hai

sabz mausam se meri duniya saja di jae

ho gaya kucha-e-tohmat mein to jina mushkil

jurm ki ab to saza hum ko suna di jae

aaina-KHane mein hairan se sab baiThe hain

in zamin-zadon ki hairat hi miTa di jae

faisla par utarne ka kiya hai 'shahnaz'

ab zara aaKHiri kashti bhi jala di jae