chaak sine ka ba-andaz-e-jigar ho ki na ho

chaak siine kā ba-andāz-e-jigar ho ki na ho

aur phir lazzat-e-jāñ zauq-e-asar ho ki na ho

tujh se ai sham.a sar-e-shām hī ruḳhsat ho luuñ

shab basar ho ki na ho vaqt-e-sahar ho ki na ho

umr-e-nazzāra usī jalve pe qurbāñ kar duuñ

phir kabhī aur mujhe tāb-e-nazar ho ki na ho

ab jahāñ vo haiñ mirā hosh vahīñ hai ai dil

be-ḳhabar maiñ huuñ unheñ is kī ḳhabar ho ki na ho

apne mahshar kī sahar bhej hī de ab yārab

ya.anī tanhā hai mirī raat basar ho ki na ho

is qadar pūchh to lo rū-e-sahar se 'kaifī'

us pe rañg-e-asar-e-dīda-e-tar ho ki na ho

chaak sine ka ba-andaz-e-jigar ho ki na ho

aur phir lazzat-e-jaan zauq-e-asar ho ki na ho

tujh se ai shama sar-e-sham hi ruKHsat ho lun

shab basar ho ki na ho waqt-e-sahar ho ki na ho

umr-e-nazzara usi jalwe pe qurban kar dun

phir kabhi aur mujhe tab-e-nazar ho ki na ho

ab jahan wo hain mera hosh wahin hai ai dil

be-KHabar main hun unhen is ki KHabar ho ki na ho

apne mahshar ki sahar bhej hi de ab yarab

yani tanha hai meri raat basar ho ki na ho

is qadar puchh to lo ru-e-sahar se 'kaifi'

us pe rang-e-asar-e-dida-e-tar ho ki na ho