chaakari mein rah ke is duniya ki mohmal ho gae the

chākarī meñ rah ke is duniyā kī mohmal ho ga.e the

ham tabhī to dekhte hī us ko pāgal ho ga.e the

jism se bāhar nikal aa.e the ham us kī sadā par

ek lamhe ko to saare mas.ale hal ho ga.e the

ishq maqnātīs par sab jamā the zarre hamāre

muntashir miTTī ke mansūbe mukammal ho ga.e the

mere har misre pe us ne vasl kā misra lagāyā

sab adhūre sher shab bhar meñ mukammal ho ga.e the

dar-ba-dar nākām phirtī thī siyah-baḳhtī hamārī

aur ham ghabrā ke un ā.ankhoñ meñ kājal ho ga.e the

maiñ makān-e-vasl meñ pahuñchā to vo ḳhālī paḌā thā

aur darvāze bhī bāhar se muqaffal ho ga.e the

gard uḌātī jā rahī thī tez-raftārī hamārī

ham-safar sab duur tak ā.ankhoñ se ojhal ho ga.e the

'farhat-ehsās' ek dam āshiq hue the jaane kis ke

dekhte hī dekhte ā.ankhoñ se ojhal ho ga.e the

chaakari mein rah ke is duniya ki mohmal ho gae the

hum tabhi to dekhte hi us ko pagal ho gae the

jism se bahar nikal aae the hum us ki sada par

ek lamhe ko to sare masale hal ho gae the

ishq maqnatis par sab jama the zarre hamare

muntashir miTTi ke mansube mukammal ho gae the

mere har misre pe us ne wasl ka misra lagaya

sab adhure sher shab bhar mein mukammal ho gae the

dar-ba-dar nakaam phirti thi siyah-baKHti hamari

aur hum ghabra ke un aaankhon mein kajal ho gae the

main makan-e-wasl mein pahuncha to wo KHali paDa tha

aur darwaze bhi bahar se muqaffal ho gae the

gard uDati ja rahi thi tez-raftari hamari

ham-safar sab dur tak aaankhon se ojhal ho gae the

'farhat-ehsas' ek dam aashiq hue the jaane kis ke

dekhte hi dekhte aaankhon se ojhal ho gae the