چالیس سال مسلسل ہو گئے

چالیس سال مسلسل ہو گئے

اب میرے بازو شل ہو گئے

میں بھی ذرا سستا لوں لیکن

باغ و بیاباں جل تھل ہو گئے

ہجر کی راتوں کے سناٹے

اس کی آنکھ کا کاجل ہو گئے

اس کے گیسو کے سائے میں

ازل ابد پل دو پل ہو گئے

خوابوں کے سب رنگ بکھر کر

اس کی چھت کے بادل ہو گئے

سر کیا پھوڑنا دیواروں سے

سب دروازے مقفل ہو گئے

کھل کر سامنے آ گئے قاتل

شہر کے کوچے مقتل ہو گئے

آنکھ اٹھا کر دیکھا اس نے

اور سارے عقدے حل ہو گئے

کچھ بھی سمجھ میں زیبؔ نہ آیا

سوچتے سوچتے پاگل ہو گئے