chand bangla so gaya suraj haweli jag uThi

chāñd bañgla so gayā sūraj havelī jaag uThī

raat kī raanī ko niiñd aa.ī chamelī jaag uThī

us bhikāran ke badan meñ so rahā thā āftāb

barf kī ḳhairāt se jis kī hathelī jaag uThī

ik vafā-dushman ko ashkoñ meñ sulāne ke liye

so gayā jab shahr saarā vo akelī jaag uThī

chāñdnī ko dhuup kā kitnā shadīd ehsās hai

ik sahelī so ga.ī to ik sahelī jaag uThī

do parindoñ ko jo dekhā kal bujhārat Dālte

zehn meñ barsoñ kī ḳhvābīda pahelī jaag uThī

ek ik lamha nichhāvar hai usī ta.abīr par

der tak jo ḳhvāb kī bāhoñ meñ khelī jaag uThī

aaj phir āñkhoñ meñ tanhā.ī kā gahrā aks hai

aaj phir dil meñ koī ḳhvāhish akelī jaag uThī

chand bangla so gaya suraj haweli jag uThi

raat ki rani ko nind aai chameli jag uThi

us bhikaran ke badan mein so raha tha aaftab

barf ki KHairaat se jis ki hatheli jag uThi

ek wafa-dushman ko ashkon mein sulane ke liye

so gaya jab shahr sara wo akeli jag uThi

chandni ko dhup ka kitna shadid ehsas hai

ek saheli so gai to ek saheli jag uThi

do parindon ko jo dekha kal bujhaarat Dalte

zehn mein barson ki KHwabida paheli jag uThi

ek ek lamha nichhawar hai usi tabir par

der tak jo KHwab ki bahon mein kheli jag uThi

aaj phir aankhon mein tanhai ka gahra aks hai

aaj phir dil mein koi KHwahish akeli jag uThi