چاند بھی گم ہے ستارہ بھی نہیں ہے کوئی

چاند بھی گم ہے ستارہ بھی نہیں ہے کوئی

تو نہیں ہے تو نظارہ بھی نہیں ہے کوئی

اب جئیں کس کے لیے اور پئیں کس کے لیے

لڑکھڑانے کو سہارا بھی نہیں ہے کوئی

بھاگتے رہتے ہیں سیلاب کے پانی کی طرح

رکنا چاہیں تو کنارہ بھی نہیں ہے کوئی

کیا پتہ کون سا رستہ ہے ہماری خاطر

کس طرف جائیں اشارہ بھی نہیں ہے کوئی

تم بھی اس شہر میں رہتے ہو اکیلے شاید

ہم بھی تنہا ہیں ہمارا بھی نہیں ہے کوئی

خواہشیں اور بھی کچھ تیرے سوا چاہتی ہیں

اک سوا تیرے گوارہ بھی نہیں ہے کوئی