chand chhune ke tasawwur se machal jata hun

chāñd chhūne ke tasavvur se machal jaatā huuñ

tujh ko sochūñ to usī vaqt bahal jaatā huuñ

tum vo dhāga ho jo lipTā hai mire siine se

aag lagtī hai tumheñ aur maiñ jal jaatā huuñ

din ko saaya sā bhaTaktā huuñ badan-zāroñ meñ

raat paḌte hī kisī ruuh meñ Dhal jaatā huuñ

nā-ḳhudāoñ se ḳhudāoñ ke bharose pe sadā

hādisa hotā nahīñ aur badal jaatā huuñ

vaise faulād huuñ ziddī huuñ irādoñ meñ magar

sāmne ho vo to lamhoñ meñ pighal jaatā huuñ

jis meñ ġhībat ko mohabbat se nikhārā jaa.e

aisī majlis se sar-e-dast nikal jaatā huuñ

kar ke pāband khulī aañkh zamāne ke liye

socheñ iz.hār kī chup-chāp nigal jaatā huuñ

jaane kis karb se guzre haiñ mohabbat vaale

un kī chīḳhoñ ko jo suntā huuñ dahal jaatā huuñ

dard baḌhtā hai to lagtā hai ki jaañ le legā

terī āġhosh meñ simTūñ to sañbhal jaatā huuñ

chand chhune ke tasawwur se machal jata hun

tujh ko sochun to usi waqt bahal jata hun

tum wo dhaga ho jo lipTa hai mere sine se

aag lagti hai tumhein aur main jal jata hun

din ko saya sa bhaTakta hun badan-zaron mein

raat paDte hi kisi ruh mein Dhal jata hun

na-KHudaon se KHudaon ke bharose pe sada

hadisa hota nahin aur badal jata hun

waise faulad hun ziddi hun iradon mein magar

samne ho wo to lamhon mein pighal jata hun

jis mein ghibat ko mohabbat se nikhaara jae

aisi majlis se sar-e-dast nikal jata hun

kar ke paband khuli aankh zamane ke liye

sochen izhaar ki chup-chap nigal jata hun

jaane kis karb se guzre hain mohabbat wale

un ki chiKHon ko jo sunta hun dahal jata hun

dard baDhta hai to lagta hai ki jaan le lega

teri aaghosh mein simTun to sanbhal jata hun