چاند چھونے کے تصور سے مچل جاتا ہوں

چاند چھونے کے تصور سے مچل جاتا ہوں

تجھ کو سوچوں تو اسی وقت بہل جاتا ہوں

تم وہ دھاگہ ہو جو لپٹا ہے مرے سینے سے

آگ لگتی ہے تمہیں اور میں جل جاتا ہوں

دن کو سایہ سا بھٹکتا ہوں بدن زاروں میں

رات پڑتے ہی کسی روح میں ڈھل جاتا ہوں

ناخداؤں سے خداؤں کے بھروسے پہ سدا

حادثہ ہوتا نہیں اور بدل جاتا ہوں

ویسے فولاد ہوں ضدی ہوں ارادوں میں مگر

سامنے ہو وہ تو لمحوں میں پگھل جاتا ہوں

جس میں غیبت کو محبت سے نکھارا جائے

ایسی مجلس سے سر دست نکل جاتا ہوں

کر کے پابند کھلی آنکھ زمانے کے لیے

سوچیں اظہار کی چپ چاپ نگل جاتا ہوں

جانے کس کرب سے گزرے ہیں محبت والے

ان کی چیخوں کو جو سنتا ہوں دہل جاتا ہوں

درد بڑھتا ہے تو لگتا ہے کہ جاں لے لے گا

تیری آغوش میں سمٹوں تو سنبھل جاتا ہوں