چاند جس طرح تنہا ستاروں میں ہے

چاند جس طرح تنہا ستاروں میں ہے

یوں ہی روشن وہ چہرہ ہزاروں میں ہے

جس نے پوچھا نہیں حال دل بھول کر

کیا ستم وہ مرے غمگساروں میں ہے

جھوم کر وہ برستی ہے کالی گھٹا

جشن بادہ کشی مے گساروں میں ہے

وہ جسے مجھ سے کوئی تعلق نہ تھا

آج بھی وہ مرے راز داروں میں ہے

کیا میرے قتل میں ہاتھ اس کا بھی تھا

اب وہی تو مرے پاسداروں میں ہے

دو قدم بڑھ کے طوفاں سے بھڑ جائیے

لاش ملاح کی تیز دھاروں میں ہے

اتنا سن کر کے زاہدؔ میں سکتے میں ہوں

نام میرا بھی قاتل کے یاروں میں ہے