chand ka aks tah-e-ab chamakta dekho

chāñd kā 'aks tah-e-āb chamaktā dekho

yuuñ bhī dard-e-dil-e-betāb chamaktā dekho

jaane kis raah pe rātoñ ke musāfir nikleñ

koī ḳhurshīd dam-e-ḳhvāb chamaktā dekho

jahl ne toḌ diye ahl-e-tadabbur ke subū

sāġhar-e-‘asr meñ zahrāb chamaktā dekho

kal mile yā na mile fikr-e-ma’īshat se najāt

aaj kī raat to mahtāb chamaktā dekho

par kisī shahr-e-tarab-nāk ko jaatā hai ḳhayāl

phir koī gul-kada-e-ḳhvāb chamaktā dekho

hai pare narġha-e-zulmat se zamāna apnā

ufuq-e-fikr-e-jahāñ-tāb chamaktā dekho

shahr-e-ehsās ke har moḌ pe rāteñ haiñ 'urūj'

shahr-e-ehsās kā har baab chamaktā dekho

chand ka 'aks tah-e-ab chamakta dekho

yun bhi dard-e-dil-e-betab chamakta dekho

jaane kis rah pe raaton ke musafir niklen

koi KHurshid dam-e-KHwab chamakta dekho

jahl ne toD diye ahl-e-tadabbur ke subu

saghar-e-‘asr mein zahrab chamakta dekho

kal mile ya na mile fikr-e-ma’ishat se najat

aaj ki raat to mahtab chamakta dekho

par kisi shahr-e-tarab-nak ko jata hai KHayal

phir koi gul-kada-e-KHwab chamakta dekho

hai pare nargha-e-zulmat se zamana apna

ufuq-e-fikr-e-jahan-tab chamakta dekho

shahr-e-ehsas ke har moD pe raaten hain 'uruj'

shahr-e-ehsas ka har bab chamakta dekho